చనిపోయి... 6 గంటల తర్వాత ప్రాణాలతో లేచిన మహిళ - Subha Telangana

Breaking

Post Top Ad

Sunday, December 08, 2019

చనిపోయి... 6 గంటల తర్వాత ప్రాణాలతో లేచిన మహిళ


చనిపోయిందనుకున్న మహిళ సుమారు ఆరు గంటల తర్వాత ప్రాణాలతో లేచి కూర్చుంది. ఈ అద్భుతం.. బార్సిలోనాలో చోటుచేసుకుంది. బ్రిటన్‌కు చెందిని మహిళ తన భర్తతో కలిసి నడుస్తుండగా మంచు తుఫాన్ చుట్టుముట్టింది. ఆ చలికి ఆమె అక్కడికక్కడే కుప్పకూలింది. దీంతో ఆమె భర్త ఎమర్జెన్సీ సర్వీసుకు ఫోన్ చేశాడు. మంచు తుఫాన్ వల్ల రెస్క్యూ సిబ్బంది అక్కడికి చేరడానికి రెండు గంటలు పట్టింది. అప్పటికే ఆడ్రీ నిర్జీవమైంది.
అత్యవసర చికిత్స అందించినా ఆమె లేవలేదు. ఆమె గుండె ఆగిపోయిందని గుర్తించిన వైద్య సిబ్బంది హెలికాప్టర్‌లో ది వాల్ డి హెబ్రాన్ హాస్పిటల్‌కు తరలించారు. అల్పోష్ణస్థితి (Hypothermia) వల్ల ఆమెకు కార్డియాక్ అరెస్ట్ అయ్యిందని డాక్టర్లు గుర్తించారు. ఫలింతంగా 37 డిగ్రీల సెల్సియస్ ఉండాల్సిన ఆమె శరీర ఉష్ణోగ్రత 20 డిగ్రీల సెల్సియస్ ఉందని తెలుసుకున్నారు. చల్లదనం వల్ల గుండె ఆగినా.. శరీర అవయవాలేవీ దెబ్బతినలేదని తెలుసుకున్నారు. ఆమె గుండె తిరిగి కొట్టుకొనేలా చేస్తే తప్పకుండా ఆమెకు ప్రాణాలు తిరిగి వస్తాయని భావించారు. ఆమె వెంటిలేటర్ ద్వారా శ్వాస అందిస్తూ.. గుండె కొట్టుకొనేందుకు చికిత్స మొదలుపెట్టారు. విశ్రాంతి స్థితిలో ఉన్న అవయవాలను పనిచేయించేందుకు రక్తాన్ని ఆక్సిజనేట్ చేశారు. నాలుగు గంటల శ్రమ తర్వాత ఆమె శరీర ఉష్ణోగ్రత 30 డిగ్రీల సెల్సియస్‌కు పెరిగింది. దీంతో ఆమె గుండె కూడా కొట్టుకోవడం మొదలైంది.
సాధారణంగా గుండెపోటు లేదా కార్డియాక్ అరెస్ట్ జరిగినప్పుడు వెంటనే చికిత్స అందిస్తే బతికే అవకాశాలు ఉంటాయి. అయితే, ఆడ్రీ మార్ష్ గుండె ఏకంగా 6 గంటల సేపు ఆగిపోయింది. సాధారణ వాతావరణంలో ఉండి ఉంటే ఆమె ఆమె శరీరంలో మిగతా అవయవాలకు రక్తప్రసరణ తగ్గిపోయి మరణించే అవకాశాలు ఉండేవి. అయితే, ఆమె శరీర ఉష్ణోగ్రత తగ్గిపోవడం వల్లే ఆమె తిరిగి ప్రాణం పోసుకోగలిగిందని డాక్టర్ ఎడ్వర్డ్ అర్గుడో తెలిపారు.
అల్పోష్ణస్థితి వల్లే ఆమె చనిపోయింది. కానీ, అదే ఆమె తిరిగి ప్రాణం పోసుకొనేందుకు ఉపయోగపడింది. చలి తీవ్రత ఎక్కువగా ఉన్నప్పుడు శరీరంలో రోగ నిరోధక శక్తి తగ్గిపోతుంది. అవయవాలకు తక్కువ రక్తం, తక్కువ ఆక్సిజన్ అవసరం అవుతుంది. ఈ పరిస్థితి వల్ల ఆమె మెదడుకు ఎలాంటి నష్టం వాటిల్లలేదు. గుండె మళ్లీ కొట్టుకోవడం ప్రారంభించిన తర్వాత మళ్లీ ఆమె సాధారణ స్థితికి చేరుకుంది'' అని వివరించారు. ఈ ఘటనపై బాధితురాలు మార్ష్ స్పందిస్తూ.. ''ఇది అద్భుతం.. వైద్యులే నాకు ప్రాణం పోశారు'' అని తెలిపింది. ప్రస్తుతం ఆమె హాస్పిటల్‌లోనే చికిత్స పొందుతోంది. త్వరలోనే డిశ్చార్జ్ కానున్నట్లు తెలిపింది. చూశారుగా.. గుండె ఆగినా, మనిషి బతికేందుకు ఎంతో కొంత ఛాన్స్ ఉంటుంది. అద్భుతం జరిగితే.. మార్ష్‌లా మళ్లీ ప్రాణం పోసుకోవచ్చు.