జాతీయ పౌర జాబితా నిర్ణయాన్ని వ్యతిరేకిస్తూ కరీంనగర్‌, ఆదిలాబాద్‌ జిల్లాలో భారీ నిరసన ప్రదర్శలు జరిగాయి. గురువారం కరీంనగర్‌లో ముస్లిం జేఏసీ ఆధ్యర్వంలో శాంతియుత ర్యాలీ నిర్వహించారు. స్థానిక తెలంగాణ చౌక్‌ నుంచి కలెక్టరేట్‌ వరకు జరిగిన ఈ ర్యాలీలో పలు ముస్లిం సంఘాలు పాల్గొన్నాయి. కలెక్టరేట్‌ వద్దకు చేరుకున్న తర్వాత అక్కడ నిరసనకారులు ధర్నాకు దిగారు. సీఏఏ, ఎన్నార్సీలను ఉపసంహరించుకోవాలని కేంద్రాన్ని డిమాండ్‌ చేశారు. మరోవైపు ఆదిలాబాద్‌ జిల్లా కేంద్రంలోనూ భారీ ర్యాలీ జరిగింది. పట్టణంలోని ఈద్గా నుంచి ప్రారంభమైన ఈ ర్యాలీ ఆర్డీవో కార్యాలయం వరకు కొనసాగింది. దీనిలో ఎమ్మెల్యే జోగు రామన్న కూడా పాల్గొన్నారు. ఆర్డీవో కార్యాలయానికి చేరుకున్న తర్వాత జోగు రామన్న, ఇతర పార్టీల నాయకులు కలిసి ఆర్డీవో సూర్యనారాయణకు వినతిపత్రాన్ని అందజేశారు.
