గుర్తింపులేని కాలేజీలపై చర్యలు తీసుకొని నివేదిక సమర్పించాలని ఇంటర్ బోర్డును కోరిన హై కోర్టు - Subha Telangana

Breaking

Post Top Ad

Friday, February 28, 2020

గుర్తింపులేని కాలేజీలపై చర్యలు తీసుకొని నివేదిక సమర్పించాలని ఇంటర్ బోర్డును కోరిన హై కోర్టు

శ్రీచైతన్య, నారాయణ కాలేజీల వ్యవహారంలో దాఖలైన పిటిషన్‌పై తెలంగాణ హైకోర్టు గురువారం విచారించింది. గుర్తింపులేని కాలేజీలపై చర్యలు తీసుకొని నివేదిక సమర్పించాలని ఇంటర్ బోర్డును ఆదేశించింది. నారాయణ, శ్రీ చైతన్య కళాశాలల్లో అక్రమాలపై విచారణ చేపట్టి గుర్తింపులేని కాలేజీలను రద్దు చేయాలంటూ సామాజిక కార్యకర్త రాజేశ్ ప్రజా ప్రయోజన వ్యాజ్యం దాఖలు చేసిన విషయం తెలిసిందే. దీనిపై రాష్ట్ర ఉన్నత న్యాయస్థానం విచారణ చేపట్టింది. ఈ సందర్భంగా రాష్ట్రంలో గుర్తింపు లేని కళాశాలలకు సంబంధించిన వివరాలపై ఇంటర్‌ బోర్డు హైకోర్టుకు నివేదికను సమర్పించింది. ఫైర్‌ డిపార్ట్‌మెంట్‌ నుంచి ఎన్‌ఓసీ పొందని కాలేజీలకు షోకాజ్‌ నోటీసులిచ్చినట్లు హైకోర్టుకు ఇంటర్ బోర్డు తెలిపింది. అయితే మార్చి 4 నుంచి ఇంటర్‌ పరీక్షలు జరగనున్న నేపథ్యంలో కాలేజీలు మూసివేస్తే విద్యార్థులపై ప్రభావం పడుతుందని.. పరీక్షలు ముగిశాక చర్యలు తీసుకోవడానికి అనుమతి ఇవ్వాలని కోర్టును కోరింది. తాము షోకాజ్‌ నోటీసులు జారీ చేసిన కాలేజీల్లో 29,808 మంది విద్యార్థులున్నారని, అలాగే ఎన్‌ఓసీ లేని కాలేజీల్లోనూ పరీక్షా కేంద్రాలు ఉన్నాయని న్యాయస్థానానికి వివరించింది. ఇప్పటికిప్పుడు కాలేజీలు మూసివేస్తే వేల మంది విద్యార్థులపై ప్రభావం పడుతుందని తెలిపింది. ఇంటర్‌ బోర్డు వాదనలు విన్న హైకోర్టు ఎన్‌ఓసీ లేని కాలేజీలపై చర్యలు తీసుకొని ఏప్రిల్‌ 3న తుది నివేదిక సమర్పించాలని ఆదేశించింది. ఇంటర్ బోర్డు గతంలో ఇచ్చిన నివేదికపై హైకోర్టు అసంతృప్తి వ్యక్తం చేసిన నేపథ్యంలో గురువారం విచారణ సందర్భంగా సమగ్ర నివేదికను కోర్టుకు సమర్పించింది.



( ఈ వార్త / వెబ్ పేజ్ నందు ఉపయోగించిన ఇమేజ్/ఛాయాచిత్రాలు గూగుల్ ఓపెన్ సోర్స్ నుండి తెసుకోనబడెను . )